Contoh Sesorah Bahasa Jawa Kegiatan di Sekolah (Perpisahan Kelas 9)

Pamitan ing Perpisahan

Sugeng enjing. Salam kasugengan. Mugi sih rahmatipun Gusti Allah ingkang Maha Kuwaos tansah tumanduk ing gesang kita sami. Amin.

Ingkang kinurmatan Ibu Kepala Sekolah SMP Negeri 1 Karangmojo, ingkang kinurmatan bapak/ibu dewan guru, ingkang kinurmatan bapak/ibu karyawan, ingkang kinurmatan Pengurus Komite SMP Negeri 1 Karangmojo, saha adhik-adhik kelas 7 lan 8 ingkang kula tresnani. Langkung rumiyin, sumangga sami ngaturaken puji sokur wonten ngarsanipun Gusti Allah ingkang Maha Kuwaos, dene kita siyang menika sami saget sareng-sareng kempal manunggal wonten ing sekolah kanthi wilujeng.

Ing salajengipun keparenga kula minangka wakil saking kelas 9, matur wonten ngarsanipun bapak/ibu guru, karyawan, miwah adhik-adhik kelas 7 lan 8 SMP Negeri 1 Karangmojo.

Sepindhah, kula sakanca kelas 9 saestu ngaturaken maturnuwun dhumateng bapak/ibu guru ingkang sampun nggulawenthah kanthi ilmu-ilmu ingkang sampun dipunparingaken sakdangunipun tigang tahun menika ngantos lulus kanthi sae.

Kaping kalih, ugi ngaturaken maturnuwun ingkang tanpa upami wonten ngarsanipun bapak/ibu karyawan ingkang ugi sampun paring panyengkuyung, pambiyantu, sambet kaliyan anggen kula sami ngangsu ngelmu wonten ing sekolah menika.

Sakdangunipun para putra sekolah ing SMP Negeri 1 Karangmojo, tamtu kathah kalepatan ingkang kasengaja menapa dene ingkang mboten kasengaja, kula awit asmanipun putra-putra kelas 9 nyuwun agunging sih pangapunten.

Kejawi saking menika, mliginipun dhumateng adhik-adhik kelas 7 lan 8, kula sakanca kelas 9 nyuwun pangapunten menawi wonten kalepatan sakdangunipun sesrawungan. Amung pesen kula supados adhik-adhik sami sregep sinau, tansah nggatosaken dhawuhipun bapak/ibu guru wonten ing sekolah lan ugi tansah mbangun turut dhateng tiyang sepuh, matemah anggenipun sekolah, saget lancar lan sukses.

Sambet kaliyan menika, para putra kelas 9 nyuwun pamit lan nyuwun pangestu wonten ngarsanipun ibu kepala sekolah, bapak/ibu guru, bapak/ibu karyawan, sarta adhik-adhik kelas 7 lan 8. Mugi-mugi kula sakanca mangkih pikanthuk sekolah ingkang cocok kaliyan gegayuhan kula piyambak-piyambak. Mekaten ugi, para putra kelas 9 gadhah pangajeng-ajeng, mugi-mugi SMP Negeri 1 Karangmojo saya majeng, saya unggul, awit saking pambinaanipun ibu kepala sekolah saha bapak/ibu guru ing sekolah menika.

Makaten ingkang saget kula aturaken saking asmanipun kelas 9 SMP N 1 Karangmojo. Tahu kupat campur santen. Menawi lepat, nyuwun pangapunten.

Maturnuwun. Gusthi mberkahi.

Tags : Pidato Bahasa Jawa, Pidato Bahasa Jawa di Kegiatan Sekolah, Contoh Sesorah, Sesorah di Sekolah, Pidato Perpisahan Bahasa Jawa, Sesorah Perpisahan

http://uny.ac.id

http://library.uny.ac.id

https://journal.uny.ac.id